IQTISODIY LIBERALIZM: IQTISODIY RIVOJLANISHDA SIYOSATNING O‘RNI, DAVLATNING ROLI, MUAMMOLARI VA MAZMUNI

Abstract

Mazkur maqolada iqtisodiy liberalizm tushunchasi, uning nazariy asoslari hamda iqtisodiy rivojlanish jarayonidagi o‘rni ilmiy jihatdan tahlil qilingan. Tadqiqot davomida iqtisodiy liberalizm sharoitida davlatning iqtisodiy siyosatdagi roli, vazifalari va funksional chegaralari aniqlab berilgan. Bozor mexanizmlarining samarali faoliyat yuritishini ta’minlashda siyosiy va institutsional omillarning ahamiyati ochib berilgan. Shuningdek, iqtisodiy erkinlik, raqobat muhiti va xususiy sektor faolligining iqtisodiy o‘sishga ta’siri yoritilgan. Maqolada iqtisodiy liberalizmning amaliyotda qo‘llanishi jarayonida yuzaga keladigan muammolar, jumladan ijtimoiy tengsizlik, davlat ishtirokining qisqarishi va bozor beqarorligi bilan bog‘liq xavf-xatarlar tahlil qilingan. O‘zbekiston Respublikasida olib borilayotgan iqtisodiy islohotlar misolida iqtisodiyotni liberallashtirish jarayonining mazmuni va ahamiyati ilmiy asosda yoritilgan. Tadqiqot natijalari iqtisodiy liberalizm va davlat iqtisodiy siyosati o‘rtasidagi optimal nisbatni shakllantirish barqaror iqtisodiy rivojlanishning muhim sharti ekanligini ko‘rsatadi.