“SOTSIOLINGVISTIKA” FANINING MAQSADI VA VAZIFALARI

Abstract

Mazkur anotatsiyada sotsiolingvistika fanining maqsad va vazifalari yoritiladi. Sotsiolingvistika til va jamiyat o‘rtasidagi o‘zaro munosabatlarni o‘rganadigan tilshunoslik sohasi bo‘lib, uning asosiy maqsadi til birliklarining ijtimoiy omillar  yosh, jins, kasb, ijtimoiy mavqe, hudud va madaniy muhit bilan bog‘liq holda qanday qo‘llanishini aniqlashdan iborat. Fan doirasida tilning ijtimoiy tabaqalanishi, nutqiy variantlar, dialektlar, til siyosati hamda ko‘p tillilik masalalari tahlil qilinadi.Sotsiolingvistikaning vazifalari qatoriga jamiyatda tilning funksional imkoniyatlarini belgilash, nutqiy xulq-atvorning ijtimoiy xususiyatlarini tadqiq etish, til va ijtimoiy ong o‘rtasidagi bog‘liqlikni ochib berish kiradi. Shuningdek, til o‘zgarishlarining ijtimoiy sabablarini aniqlash, til me’yorlari va ularning jamiyat taraqqiyotiga ta’sirini baholash ham muhim vazifalardan hisoblanadi. Mazkur fan tilshunoslik, sotsiologiya va madaniyatshunoslik chorrahasida rivojlanib, tilning jamiyatdagi o‘rni va ahamiyatini ilmiy asosda tushuntirishga xizmat qiladi.