INDIVIDUAL O‘RGANISH VA MUSTAQIL VAZIFALARNI BAJARISHNING O‘RNI

Abstract

Mazkur maqolada yakka tartibda o‘rganish va mustaqil vazifalarni bajarishning ta’lim jarayonidagi o‘rni hamda ahamiyati tahlil qilinadi. Yakka tartibda o‘rganish o‘quvchilarda mustaqil fikrlash qobiliyatini shakllantirish, bilimlarni chuqurroq o‘zlashtirish va amaliy ko‘nikmalarni rivojlantirishga xizmat qiladi. Shu bilan birga, mustaqil vazifalarni bajarish o‘quvchilarning mas’uliyat hissini oshirib, ularning ta’lim jarayonidagi faolligini kuchaytiradi.

Mustaqil ta’limni samarali tashkil etish metodlaridan biri sifatida HAITI metodi alohida e’tiborga loyiqdir. Ushbu metod nomi ta’lim jarayonida amalga oshiriladigan bosqichlarning bosh harflari asosida shakllangan. Dastlab auditoriyada (Im Hörsaal) vazifalar taqdim etiladi, so‘ng talabalar ularni yakka tartibda (Alleine) o‘rganadilar. Keyingi bosqichda o‘zlashtirilgan material yoki yechimi topilishi lozim bo‘lgan masalalar guruh (Im Team) a’zolari bilan muhokama qilinadi va muammolar tahlil etiladi. Nihoyat, keyingi mashg‘ulotda (In der nächsten Übung) yuzaga kelgan tushunmovchiliklar va yechilmagan masalalar o‘qituvchi tomonidan izohlanadi va bartaraf etiladi. Ushbu metodni qo‘llash jarayonida talabalar 3–6 kishidan iborat kichik guruhlarga bo‘linadi va har bir guruh o‘z axborotchisini saylaydi. Axborotchi o‘qituvchi va guruh a’zolari o‘rtasida aloqa va muvofiqlashtirish vazifasini bajaradi.